សាលាឧទ្ធរណ៍ភ្នំពេញបានប្រកាសសាលដីការតម្កល់ការសម្រេចរបស់សាលាដំបូងខេត្តកំពង់ឆ្នាំង ដែលផ្ដន្ទាទោសប្រជាសហគមន៍ឡពាង ខេត្តកំពង់ឆ្នាំងចំនួន៥នាក់ក្រោមបទចោទ «ហិង្សាដោយចេតនាមានស្ថានទម្ងន់ទោស» និងបទ «ធ្វើឱ្យខូចខាតដោយចេតនាមានស្ថានទម្ងន់ទោស» ដែលប្ដឹងដោយក្រុមហ៊ុន ខេ.ឌី.ស៊ី (KDC)។សាលដីកានេះត្រូវបានប្រកាសកាលពីថ្ងៃទី១២ខែកញ្ញាឆ្នាំ២០២៥។
អ្នកនាំពាក្យសាលាឧទ្ធរណ៍ភ្នំពេញលោក ឃុន លាងម៉េង បានប្រាប់ប្រជាកាសែត ថាសាលាឧទ្ធរណ៍ភ្នំពេញបានសម្រេចតម្កល់សាលក្រមរបស់សាលាដំបូងខេត្តកំពង់ឆ្នាំងទុកជាបានការដដែល លើករណីប្រជាសហគមន៍ឡពាង ខេត្តកំពង់ឆ្នាំង។
លោកថា៖ «ប្រកាសតម្កល់»។
ករណីនេះ សាលាដំបូងខេត្តកំពង់ឆ្នាំងបានផ្ដន្ទាទោសពលរដ្ឋទាំង៥នាក់ឱ្យជាប់ពន្ធនាគារចំនួន៣ឆ្នាំ និងទារសំណងសរុបចំនួន១០លានរៀល ក៏ប៉ុន្តែទោសជាប់ពន្ធនាគារត្រូវបានព្យួរ ក្រោយពីពួកគេបានជាប់ឃុំរយៈពេលខ្លី។
ប្រជាសហគមន៍ឡពាង ខេត្តកំពុងឆ្នាំងដែលជាប់ចោទក្នុងករណីនេះគឺលោក ស្ងួន ញឿន អាយុ៤៥ឆ្នាំ បានប្រាប់ថា លោកយល់ថាវាជារឿងអយុត្តិធម៌ដែលសាលាឧទ្ធរណ៍ភ្នំពេញកម្កល់សាលក្រមដែលសាលាដំបូងខេត្តកំពង់ឆ្នាំងកាត់ទោសលោក ព្រោះលោកមិនបានប្រព្រឹត្តដូចការចោទប្រកាន់នោះទេ។
លោកថា៖ «ខ្ញុំអត់មានបានធ្វើអត់មានបានប្រព្រឹត្តអីសោះបានជាតុលាការនៅតែកាត់ក្ដីតាមតែគ្នាដដែលៗ ខ្ញុំយល់ថាវាអត់យុត្តិធម៌សម្រាប់ពួកខ្ញុំដែលជាជនរងគ្រោះទេ គេមកវ៉ៃខ្ញុំ អាពេលដែលខ្ញុំធ្វើសន្និសីទកាសែតសោះគេមកគប់ខ្ញុំ បែរជាខ្ញុំជាជនរងគ្រោះត្រូវចោទប្រកាន់របស់តុលាការទៅវិញ»។
លោកបន្ថែមថា៖ «ចំពោះខ្ញុំៗអត់ជឿជាក់លើប្រព័ន្ធយុត្តិធម៌ទេ តែត្រូវតែដើរឱ្យអស់ផ្លូវច្បាប់ទាំងថ្នាក់ក្រោម ទាំងថ្នាក់កណ្ដាល ទាំងថ្នាក់កំពូលហ្នឹង»។
ចំណែកឯប្រជាសហគមន៍មួយរូបទៀតដែលជាប់ចោទដែរនោះគឺលោក សៀង ហេង អាយុ៤៥ឆ្នាំ និយាយថា នេះជាការសម្រេចដែលអយុត្តិធម៌សម្រាប់លោកដែលជាពលរដ្ឋទន់ខ្សោយ ពីព្រោះករណីហិង្សានេះ ភាគីកម្មករក្រុមហ៊ុនជាអ្នកបង្កហេតុមុនលើក្រុមពលរដ្ឋ។
លោកថា៖ «ការផ្ដន្ទាទោសនៅដដែលមានន័យថាតុលាការអត់យុត្តិធម៌សម្រាប់អ្នកទន់ខ្សោយ ព្រោះភាគីកម្មកររបស់ក្រុមហ៊ុនអ្នកបង្កមុនមកលើពលរដ្ឋហើយនៅតែមានឱកាស មានការប្ដឹងចោទប្រកាន់មកលើពលរដ្ឋធ្វើឱ្យរស់គ្រោះដីធ្លីហើយមករងគ្រោះបទហិង្សាទៀត»។
លោក សៀង ហេង ថាលោកប្រហែលជានឹងប្ដឹងបន្តលើករណីនេះទៅតុលាការកំពូល ព្រោះការសម្រេចរបស់សាលាឧទ្ធរណ៍ភ្នំពេញអយុត្តិធម៌ចំពោះលោក។ ជាមួយគ្នានេះ លោកស្នើភាគីក្រុមហ៊ុន KDC ឱ្យដោះស្រាយបញ្ហាដីធ្លីជាមួយប្រជាសហគមន៍ឡពាង។
ជុំវិញករណីនេះ នាយកទទួលបន្ទុកការងារទូទៅនៃអង្គការលីកាដូលោក អំ សំអាត ប្រាប់ថាសោកស្ដាយចំពោះការសម្រេចរបស់សាលាឧទ្ធរណ៍ភ្នំពេញដែលបានតម្កល់សាលក្រមរបស់សាលាដំបូងខេត្តកំពង់ឆ្នាំងលើប្រជាសហគមន៍ឡពាងចំនួន ៥នាក់។
លោកថា៖ «យើងមានការសោកស្ដាយចំពោះសាលដីការរបស់សាលាឧទ្ធរណ៍ដែលសម្រេចតម្កល់សាលក្រមរបស់សាលាដំបូងទុកជាបានការ ពីព្រោះយើងមើលទៅករណីសហគមន៍ឡពាងនេះ វាជាករណីដីធ្លីដ៏រ៉ាំរ៉ៃ វាយូរមកហើយៗពលរដ្ឋជួបនូវជីវភាពលំបាកកាន់តែខ្លាំង ហើយជាពិសេសពួកគាត់ក្រៅតែអំពីអត់ទាន់មានដំណោះស្រាយបញ្ហាដីធ្លីហ្នឹងគឺត្រូវរងបណ្ដឹងនៅតុលាការជាបន្តបន្ទាប់»។
លោក អំ សំអាត ស្នើភាគីពាក់ព័ន្ធពន្លឿនការដោះស្រាយបញ្ហាដីធ្លីរវាងសហគមន៍ឡពាង និងក្រុមហ៊ុន KDC ដើម្បីឱ្យជីវភាពប្រជាសហគមន៍មានភាពប្រសើរឡើង ព្រោះបច្ចុប្បន្នពួកគេកំពុងលំបាក ព្រមទាំងអាចប្រឈមបញ្ហាផ្សេងទៀតនាពេលខាងមុខ។
លោកបន្ថែមថា៖ «អ្វីដែលសំខាន់ភាគីដែលពាក់ព័ន្ធក៏ដូចជាអាជ្ញាធរឬក៏ក្រសួងពាក់ព័ន្ធគួរតែពន្លឿននីតិវិធីដើម្បីដោះស្រាយបញ្ហាដីធ្លីនៅសហគមន៍ឡពាងនេះឱ្យមានលទ្ធផលល្អ ហើយអាចទទួលយកបានអាហ្នឹងវាជាជម្រើសដ៏ល្អហើយជាការលើកកម្ពស់ទៅលើជីវភាពរស់នៅរបស់ពលរដ្ឋ កាលណាបញ្ហាចេះតែអូសបន្លាយ ជីវភាពប្រជាពលរដ្ឋក៏កាន់តែពិបាកទៅ ហើយអាចឱ្យមានចំណាកស្រុក អាចឱ្យមានកុមារឈប់រៀន»។
សហគមន៍ឡពាង ស្ថិតនៅភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង មានជម្លោះដីធ្លីជាមួយក្រុមហ៊ុន ខេ.ឌី.ស៊ី (KDC) ដែលគ្រប់គ្រងដោយអ្នកស្រី ជា ខេង ភរិយាអតីតរដ្ឋមន្រ្តីក្រសួងរ៉ែ និងថាមពល លោក ស៊ុយ សែម តាំងពីឆ្នាំ២០០០។ ជម្លោះដីធ្លីនេះបានធ្វើឱ្យប៉ះពាល់ដល់ប្រជាសហគមន៍ចំនួន១០៨គ្រួសារ។ ពលរដ្ឋដែលរងផលប៉ះពាល់បានតវ៉ាទាមទាររកដំណោះស្រាយជាបន្តបន្ទាប់ តែពុំទទួលបានលទ្ធផលឡើយ ហើយពួកគេបានរងបណ្ដឹងពីសំណាក់ក្រុមហ៊ុន KDC ក្រោមបទចោទព្រហ្មទណ្ឌមួយចំនួន។
ប្រជាសហគមន៍ចំនួន៥នាក់គឺ លោក សៀង ហេង លោក ម៉ាង យ៉ាវ លោក គុជ ហុក លោក ស្ងួន ញឿន និងលោក ស្រ៊ុន ផា ត្រូវបានក្រុមហ៊ុន KDC ប្ដឹងដោយចោទថាពួកគេបានប្រើហិង្សាទៅលើភាគីក្រុមហ៊ុន ក្រោយពីពួកគេបានប៉ះទង្គិចគ្នា កាលពីឆ្នាំ២០១៤៕
